بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى م.احمەتجانوۆ ۆەدومستۆونىڭ ءبىرىنشى جارتىجىلدىقتاعى جۇمىس قورىتىندىسى بويىنشا وتكەن القا وتىرىسىندا مالىمدەدى, دەپ جازادى Egemen.kz.
ۆەدومستۆو باسشىسى بارلىق سىبايلاس جەمقورلىق قىلمىسىنىڭ ۇشتەن ءبىرىن پارا بەرۋشىلەر قۇرايتىنىن ايتىپ, ولاردىڭ سانى تومەندەمەي وتىرعانىنا الاڭداۋشىلىق ءبىلدىردى. اگەنتتىك توراعاسىنىڭ پىكىرىنشە, حالىققا پارا بەرىپ, ءوز ماسەلەسىن تەز ءارى جەڭىل شەشكەن ىڭعايلى. ادامدار زاڭسىز ارتىقشىلىق نەمەسە پايدا الۋ, بيۋروكراتيالىق كەدەرگىلەردى اينالىپ ءوتۋ ءۇشىن پارا بەرۋگە ءماجبۇر.
اگەنتتىك توراعاسىنىڭ پىكىرىنشە, بۇل ماسەلە ءىشىنارا ازاماتتاردىڭ مەنتاليتەتىنە بايلانىستى. كەيبىر ادامدار ءۇشىن ماسەلەنى پارامەن شەشۋ ءومىر ءسۇرۋ نورماسىنا اينالعان.
«وكىنىشكە وراي, «قول اقىسىن بەرۋ», «سىي-سياپات بەرۋ» سەكىلدى جاعىمسىز ادەتتەر حالىقتىڭ بويىنا ءسىڭىپ كەتكەن. ياعني, ادامدار شەنەۋنىكتەردىڭ پارا الۋىنا سانالى تۇردە بارادى», دەدى ول.
م.احمەتجانوۆتىڭ ايتۋىنشا, پارا بەرۋشى ادامدار دا قىلمىسقا قاتىسۋشى بولاتىنىن جانە ءتيىستى جاۋاپكەرشىلىككە تارتىلاتىنىن ءتۇسىنۋى ءتيىس.
«تسيفرلاندىرۋ, قۇقىقتىق قۇرالدار مەن بيۋروكراتيالىق كەدەرگىلەردى جويۋ, جۇمىستى اشىق جانە ايقىن ەتۋ – جەمقورلىقتى جويۋعا ىقپال ەتەدى. سوندا عانا حالىق اگەنتتىككە جۇگىنىپ, كومەك سۇرايدى», دەپ قورىتىندىلادى ول.